Pantun

15 Buah Pantun

Kandangan jambatan papan
Martapura jambatan wasi
Kaganangan di wayah makan
Banyu mata gugur ka nasi

Bukan aku mananam pandan
Tapi aku mananam kaladi
Bukan aku mamandang tampan
Tapi aku mamandang budi

Amun kutahu manisnya susu
Kada kucampur lawan gula
Amun kutahu cintamu palsu
Kada kuterima dari samula

Manisnya limau di darat
Siapa jua ampun tanaman
Manisnya nang batahi lalat
Siapa jua ampun tunangan

Kalau kaka mandi ka hulu
Ambilkan ading bunga kambuja
Kalau kaka mati dahulu
Hadangi ading di lawang surga

Jaruju padang jaruju
Disangkutakan ka atas dahan
Sudah untung nasib diriku
Disarahakan kapada tuhan

Tiwadak marimbun daun
Tapi sayang kada babuah
Hati handak batahun-tahun
Tapi sayang inya masih sakulah

Makan karak di dalam panci
Makan nasi batambah pulang
Awan ba arak nang ditangisi
Kakasih jauh di banua urang

Buat apa bajalan kaki
Amun kada mamakai sandal
Buat apa handak babini
Amun kada baisi mudal

Kuputik naya si bunga mawar
Mawar naitu habang warnanya
Hati naini tarasa bagatar
Saat dikau nyatakan cinta

Matan pasar lama ke barabai
Mambawa karung baisi tomat
Patuah agama jangan diabai
Maka hidup balimpah rahmat

Buah anggur lain pang tumat
Jangan ditukar lawan nang lain
Amun diri handak tahurmat
Hurmatilah urang lain

Pasang bandira katuk dauh
Naik taksi ka Bati-Bati
Supaya cidera jangan tumbuh
Baik-baik mambawa diri

Dari Barabai ka Kandangan
Di tangah jalan baulih sumangka
Jangan diabai parintah Tuhan
Matinya bisa masuk naraka

Gugur mantapuk buah ramania
Mantah dimakan tarasa latar
Jangan mabuk mancintai dunia
Hidup ini hanya sabantar