Syair

15 Buah Syair

Tanam melati di huma-huma
Dabur dabur angin sanja
Amun jadi hidup bersama
Kita mahambur kambang saroja

Handak mari-ing kayu baduri
Halat sakilan mandua jari
Handak guring kada jadi
Hati dandam di rasuk mimpi

Siuragung di puhun kasturi
Buah manggis gugur sabigi
Mamakan jagung sambunyi-sambunyi
Anak manangis kada dibari

Urang tuha sudahlah lali
Mata kabus pandangaran tuli
Manyumpah aku kada parduli
Manyambah musuh enggan sakali

Jalan-jalan ka Ujung Murung
Hari panas maurak payung
Biar habis duit sakantung
Asal dapat nang hidung mancung

Banyak kumbang ditaman bunga
Hanya satu nang kupuja
Banyak pemuda tampan wajahnya
Hanya satu nang kucinta

Tulang ikan mas patah dua
Agar-agar takipai ka bawah tangga
Mambuang naas kala bacinta
Agar bahagia dalam barumah tangga

Patah tainjak pisau balati
Si Atun datang sambil manari
Janganlah syak didalam hati
Ini syair mahibur diri

Ada labu di tangah padang
Dirabutakan anak bilalang
Malihat mamaku datang
Hati sadih manjadi hilang

Jalan-jalan ka kuta Paris
Malihat rumah babaris-baris
Biar mati diujung karis
Asal dapat nang hirang manis

Matan mana handak kamana
Matan Kalua ka Bandar Cina
Amun bulih kaka batanya
Ading nang langkar siapa ampunnya


Halabiu tanahnya rata
Dikulilingi kumpai banta
Kalau anak handak bacinta
Bisa-bisa maulas kata

Kuumpamakan palita itu lilin
Baliuk-liuk ditampur angin
Kada nyaman jadi pemimpin
Harus ingat rakyat nang miskin

Rasa dan akal, daya dan nafsu
Di alam raga nyata basatu
Aku maliputi segala liku
Matan hujung rambut ka hujung kuku

Dadalang simpur bamain wayang
Wayang asalnya si kulit kijang
Agung dan sarun babun dikancang
Kaler bapasang di atas gadang